Slitgigt (osteoarthritis)

Slitgigt er algengasta tegund gigtar. Slit í stoðkerfinu er eðlilegur fylgikvilli hækkandi aldurs, en slitgigt telst snemmbúin brjóskeyðing og er óafturkræfur, krónískur sjúkdómur. Slitgigt getur greinst í öllum liðum, en er algengust í höndum, hnjám, mjöðmum og baki.

Helstu einkenni slitgigtar eru

• liðverkir eftir kyrrsetu / svefn
• liðverkir eftir nokkra eða mikla hreyfingu
• minnkað hreyfiútslag í lið

Athugið að einkenni slitgigtar skarast við mörg önnur stoðkerfisvandamál, og hana greina bæklunarlæknar með góðri skoðun, prófunum og með stuðningi myndgreiningar.

Í ljósi langra biðlista eftir liðskiptaaðgerðum er enn mikilvægara en áður að þú leitir þér aðstoðar sjúkraþjálfara við að halda heilsu og halda lífsgæðum sem verða má. Fórnarkostnaður langrar biðar er minnkaður árangur aðgerðar þegar að henni kemur, auk lækkaðra lífsgæða á meðan á biðinni stendur. Ekki bíða með að leita þér aðstoðar!

Í samstarfi við sjúkraþjálfara lærir þú hvað þú getur gert:

• til að lina einkenni slitgigtar
• hvað þú getur gert í forvörn til að hægja á þróun slitgigtar
• hvernig þú getur minnkað daglegan sársauka
• hvernig þú getur byggt upp aðra þætti stoðkerfisins til minnka álag á umræddan lið.

Í þessu felst meðal annars notkun spelka / teipinga, sprautur, tímabundin upplýst og ábyrg notkun lyfja í samráði við lækni (sjá umfjöllun Helga Jónssonar, gigtarlæknis á heimasíðu Gigtarfélags Íslands  hér ) lækkun á líkamsþyngdarsstuðli (þegar hækkun á honum á við), og ekki síst sérsniðin og persónuleg æfingaáætlun sem hentar þér og ágerir ekki verkjum.