„Vöðvabólga” er að vissu leyti rangnefni. Ástandið er ekki náttúrulegt og æskilegt gróandaferli eins og sú bólga sem við sjáum í kjölfar þess þegar við t.d. tognum. Ástandið „vöðvabólga” felur frekar í sér síspennuástand á vöðvunum sem veldur skertu blóðflæði til þeirra.

Vöðvabólga er stundum af völdum aukinnar kyrrstöðu, miður góðrar líkamsstöðu, eða jafnvel af völdum endurtekinna, einhæfra hreyfinga yfir langan tíma.  Hún fylgir frekar lífsstíl sem einkennist af mikilli kyrrstöðu, sér í lagi (en ekki einungis) í sitjandi stöðu. Einnig veldur ákveðin líkamsbygging aukinni áhættu á vöðvabólgu í hálsi og herðum, eins og aukin sveigja á brjóstbaki, eða framstætt höfuð.

Auk einkennameðferðar hjá sjúkraþjálfara sem getur minnkað einkenni þín tímabundið er mikilvægast að þú, í samstarfi við sjúkraþjálfara, komist af stað í æfingamiðaða meðferð, ekki síst til að minnka tilhneigingu þína til vöðvabólgu til langs tíma litið.  Þú lærir að auka blóðflæði um svæðið sjálf(ur). Langbesta leiðin til að tækla tilhneigingu til vöðvabólgu eru æfingar og leiðrétting á ávanabundinni líkamsstöðu.